2018/11/10eko herri batzarra

HERRI BATZARRA

Kaixo lagun.
Ohar honen bidez datorren larunbatean, Azaroak 10, goizeko 10etan Muara elkartean, Hondarribiko EH Bilduk antolatu duen Herri Batzarrean beste Hondarribi bat nahi duen jende guztiari parte hartzeko gonbitea luzatu nahi diogu.

 

 

2019ko Udal hauteskundeei begira gaude eta horretan jarraituko dugu.

Anima Zaitez eta Parte Hartu.

Alardearen inguruko gertakarien harira aurkeztutako mozioa

Ondoren duzuen testua mozioaren aurkezpena da, irudian berriz mozioa bera:

Mozio honekin ez dizuegu eskatzen irailaren 7tik 8ra gure Kale Nagusia okupatuta egotearena salatzea, nahiz eta okupazio horrek bizilagunei eragozpen nabariak sortzen dizkion eta udal araudiak urratzen duen. Araudia urratze horrek Gobernu Taldearen baimena balu esan eta egingo dugu dei publiko bat etxerik gabeko jendea edota migranteak gure Herriko kaleetara etortzeko bertan lo egitera, eskertuko dute eta.

Ez dizuegu eskatzen ere Ertzaintzari galdera sorta luzatzea zergatik irailaren zortzian Barne Sailaren aginduak betearazi ez zituen, edo aginte judizialik ba ote zuen Jaizkibel konpainiako adin txikikoak bideoz grabatu ahal izateko. Nola ez dizugun eskatzen ere espediente bat irekitzea aztertzeko zergatik Udaltzaingoak tratu ezberdin ematen dion talde bati pankartak zintzilikatzen uzten dionean beste talde bati kentzen dizkion bitartean.

Ahal genizuekeen eskatu ere irainak, ttuak eta plastiko beltzak ez jartzea eta bakoitzak defendatu nahi dituenak defenda eta aldarrika ditzala modu ez erasokorrean eta eraikitzailean. Baina ez, gaurkoan irailaren zortzian jasan genuen eraso fisiko bat jasan onartzera eta salatzera gonbidatzen zaituztegu, Jaizkibel konpainiaren jarduera eragoztera zuzendua zegoena eta pertsona ez gutxirengan izua eta negarra sortu zuena. Plastiko beltzen atzean oihuka, irainka eta txistuka jardun zirenen helburua ez zen tradizio bat defendatzea, baizik eta Jaizkibel boikotatzea, konpainiako kideak umiliatzea eta kikiltzea. Zilegi al da jaia ulertzeko ustezko modu hori gorrotoaren, ukazioaren eta indarkeriaren bidez adieraztea? Uste dugu talde erasotzaileak bizikidetza marra gorri guztiak luzez gainditu zituela. Holako erasoak salatuko ez bagenitu, beste edozein talderi onartu beharko geniokeen antzerako protesta zaratatsuak Alarde Tradizionalista pasatzerakoan, Aste Santuko prozesioaren aurrean edo eta Musika
bandaren Kontzertu batean eta hori onartezina iruditzen zaigu.

Mozio honen helburua ez da Udalbatza honetan Alardeari buruzko eztabaida bat hastea, nahiz eta hori oso beharrezkoa izan gure ustetan. Gainera, lanketa hau jendartean modu ireki, lasai eta presiorik gabekoan egin beharko litzateke eta ez dugu uste, hemen eta orain, horretarako leku aproposa denik. Mozio honen helburua alderdi bakoitzaren jarrera publikoa egitea da, egun hartako erasoaren aurrean: babesten ala arbuiatzen duzue eraso hura? Bata ala bestea, argi eta garbi.

Azken finean demokrazia kontua da, oinarri oinarrizkoak diren joko arauak ez baditugu ozen eta tinko aldarrikatzen, eta egindako okerrak publikoki arbuiatzen, babesa eta laguntza ematen diegu talde hauei edo beste edonori, justifikaezinak diren jarrerak berriro errepikatzeko inpunitate osoarekin .

Benta Zaharraren parkingaren gainekoa

Uda hasieran, gaian iritzi kualifikatua duen kide batek jakinarazita, gure kezka azaldu genuen Udalean, Hirigintza batzordean hain zuzen ere, Benta Zaharreko parkinga eusten duen egituraren egoera tamalgarria zela eta, argazkiz hornituta.
Udal arkitektoak bere gain hartu zuen eta zegokion erakundean jakinarazi eta eskaera bideratuko zuenaren hitza eman zigun. Ez dugu zalantzan jartzen udal teknikariren lanik, baina erantzunik jaso ez genuenez, badaezpada, beste mezu bat helarazi genion Udal Arkitektoari abuztuaren 23an, gure larritasuna adieraziaz.
Udal Arkitektoak bere ardura eta lana ondo beteaz, (udal honetan kasu guztietan gertatzen ez denez) Eusko Jaurlaritzako Portu eta Itsas Gaietarako Zuzendaritzak, gaia bereganatu eta proiektua prestatu du, beharrezko konponketak burutzeko.
Honaino, ohiko prozedura: herritarren bitartez gabezia bat antzeman eta komunikatu, herri ordezkariak garen neurrian erantzukizunez dagokion tokian jakinarazi eta jarraipena egin, eta diskrezioz eta eraginkortasunez, udal langintzan eragin.
Gertatutakoaren argitan ordea, ez da berdina guztien jokabidea.
Itzela izan zen sorpresa, joan zen ostiraleko Hitzan albistearen berri irakurri genuenean. Herriko korrespontsalaren hitzetan, aipatu arazoa, Abotsanitz alderdiak bideratu zuen, irtenbidea eman, komunikatu eta abar, kasu jakin honetan, ezer gutxi egin ez duenean; are okerragoa dena, gure interbentzioaren aipamen ñimiñoena ere egin gabe.
Ez gara gu auto-laudoriotan ibili zale, gu ez ginen Udalean sartu medailak paparrean jartzeko, egiten dugun lana bere gauza on eta akats guztiekin, jendarte hobeagoa lortzearen bidean, ahal dugun ekarpentxoa egitean datza, eta emaitzaren bat gauzatu ezkero, horixe da guretzat saririk handiena.
Beste talde batek gure lana baliatzea, hobekuntza batzuk bereak balira bezala jendearen aurrean aurkezteko, aldiz, espero ez genuen edukazio eta errespetu politiko falta nabarmentzat hartu dugu; are handiagoa, edukazio eta errespetu hori bereziki zaindu izan dugunean talde horrekin.

2018ko irailaren 8an GORROTOARI STOP!

Hondarribiko hirian bizikidetza hautsi egin da eta ez dugu ahaztu behar, batez ere, hautetsien eta agintarien ardura dela hiritarren arteko errespetuzko elkarbizitza.

Irailaren 8an, Jaizkibel konpainiak, hari ezarritako orduan desfilatzerakoan, irainak, bultzakadak eta kazetarien kontrako erasoak zabaldu ziren kale Nagusian barrena. Oro har, Jaizkibel konpainiaren desfilearen aurkako boikot ekitaldi antolatua izan zen. Ederki antolatu gainera, ohikoa den bezala, poltsa tzarretan ekarri eta banatu baitzituzten, plastiko beltzak, txartelak, turutak eta txifloak.

Aurten, berriro ere, Hondarribiko Udalak, Gipuzkoako Foru Aldundiak eta Eusko Jaurlaritzak ahalbidetu dute kale Nagusiaren okupazioa eta berdintasunaren aurkako boikota; Ertzaintzak ez ditu eragotzi plastiko beltzak, irainak, gutxiespen portaerak eta konpainiaren desfilea desitxuratzea. Udaltzaingoak, bide beretik, ez ditu haien mezu, kartel, plastiko, etab. eragotzi, baina arin eta prestu, ziztu bizian kendu ditu berdintasuna eta babes mezuak zituzten pankartak.

ASKI DA! Larunbatean ikusitakoa eta bizi izandakoa, gorroto adierazpen larria da; ez du zerikusirik adierazpen askatasunarekin. Desberdin pentsatzen dutenak iraintzea, jazartzea, gutxiestea, erasotzea, haien adierazpena eragoztea eta herritik bidali nahi izatea, ez da adierazpen askatasuna, gorroto adierazpena baizik.

Herriko jaiak modu desberdinean ulertu eta bizi daitezke, jakina; beti ere, oinarrizko eskubideak urratu gabe eta elkarren errespetuan.

Herriko jaiak, Hondarribikoak ere, erakunde publikoen ardurapekoak dira, Hondarribiko Udalaren ardura, nagusiki. Herriko jaiak guztienak eta guztientzakoak dira, publikoak dira. Erakunde pribatu batek ezin bahitu dezake jaien izaera publiko hori; ezin bereganatu dezake kalea, herriko ondare, ikur eta ohiturak; horiek, herritar guztienak dira, ez inolako erakunde pribaturenak.

Erakunde publikoek, Udalak, Foru Aldundiak eta Jaurlaritzak, kale egin dute. Erakunde publikoek ezin utz dezakete eremu publikoa eta kultur ondare munizipala

elkarte pribaturen esku; are gutxiago, gorrotoa zabaltzeko eta boikota egiteko bada. Erakunde publikoek, guztiek: Udalak, Foru Aldundiak eta Jaurlaritzak, besteak-beste, emakumezkoen eta gizonezkoen arteko berdintasuna babestu behar dute, izan eremu publikoan, zein pribatuan ere.

Oinarrizko eskubideak, bete-beharrekoak dira, sustatu beharrekoak, zaindu beharrekoak, babestu beharrekoak. Ezin dira urratu. Oinarrizko eskubide horietako bat da berdintasuna, inor ez dago salbuetsita. Urratzen duena elkarte pribatua bada ere, oinarrizko eskubidea urratzen ari da, ez da zuzen jokatzen ari. Baina inork ez ba die eskatzen, arautzen, bideratzen, puztu egiten dira, harrotu, gaiztotu eta ustez nagusi izanik, gorrotoa zabaltzen dute, joan den larunbatean ikusi eta jasan izan genuen bezala.

Irailaren 6ean, korporazioak herriari agurra dantzatu ostean, Aginte-makila sinbolikoki baino, literalki ematen zaiela pentsatzen dutela ikusi dugu, eta herri erakundeek ez die kontrakorik ikusarazi. Ezin da elkarbizitzaren erantzukizuna bazterrean utzi, udalarena da, Alkaterena da. Erantzukizun hori bere egin eta egoera zuzendu behar du udalak, Alkateak, adoretsu, beldurrik gabe.

Irailaren 8an desfile parekidearen aurkako boikota eta gorroto adierazpena gaitzesten dugu. Alkateari eskatzen diogu konponbiderako oinarriak jar ditzala. Gu aldamenean izango gaitu langintza horretan, izan udalgintzan zein herrigintzan.

Hondarribian, 2018ko irailaren 10an

PDFan

Muararen kontrako eraso berria

Muara elkarteak Abuztuaren 30ean jasan zuen erasoa salatzeko zabaldutako adierazpena, PNV, Abotsanitz, PSE-EEk eta PPren babesa eduki zuena:

Gorrotozko eraso gehiagorik ez!

Urte honetan, apirilaren 21ean gauean, ordu txikitan, bi gizonezkok eraso zuten
Muara Elkartearen egoitza. Kanpoaldean zeuden bandera mastak errotik erauzi zituzten,
ikurrina txikitu eta lapurtu zuten, “yo soy español, español, español” oihukatzen zuten
bitartean. Joan den abuztuaren 30ean, iluntzeko 20:00rak inguruan, berriro ere, bi
gizonezko furgonetan agertu ziren eta Muara Elkarte parean geratu, horietako batek
jauzi batez heldu zion ikurrinari, hausteko asmoz; ez zuen lortu, baina masta okertu
zuen. Ondoren, furgonetaren gainean jarrita, labana batez ebaki zuen ikurrina eta
lapurtu.
Lau hilabetetan bi eraso Muara Elkartearen aurka eta ikurrinaren aurka. Gorroto
erasoak, eraso faxistak nolanahi ere. Kasu bietan salaketa jarri izan dugu udaltzaingoan.
Lehenengo erasoaldian ez da lortu gaizkileak identifikatzea, bigarren kasuan berriz bai.
Irailaren 5ean goizeko 9:30etan izango da epaiketa bizkorra Irungo epaitegian. Bertan
izango gara eta, gurekin batera, nahi duen oro etor dadila gorroto-erasoak salatzera.
Erasoak ez baitira izan gaueko liskar arruntak, helburuak, egiteko moduak eta
izandako inpunitateak agerian jartzen du gorroto-erasoak izan direla. Latz borrokatu
behar izan genuen ikurrina legeztatzeko eta askatasunez erabili ahal izateko. Berriro ere,
ikurrina defendatu behar dugu askatasuna defendatzeko.
Hondarribiko alderdi politikoei eta herritar orori eskatu nahi diogu erasoak sala
ditzan eta askatasunaren defentsan gurekin bat egin dezan.

Hondarribian, 2018ko Irailaren 3an
MUARA ELKARTEA

Muara elkartearen kontrako erasoa salatu du Hondarribiko udalbatzak aho batez

Hau izan da Hondarribiko EHBilduk udal plenoan aurkeztu eta aho batez onartua izan den adierazpena:

Hondarribiko EHBilduk Muara elkarteak jasandako erasoaren aurrean honako eskari hau plazaratu nahi diegu Udalbatza honen partaideei:

Apirilaren 21etik 22rako gauean Hondarribiko Muara elkartearen kontrako eraso bat izan zen. Zehazki, gaueko ordu txikietan ezezagun batzuk elkarte honek atarian zituen mastetan zeuden ikurrinak eta banderolak kendu eta txikitu zituzten “Yo soy español” eta “viva España” ohikatuz.
Ez da lehen aldia elkarte honek honelako bortizkeriazko erasoak jasaten dituela, beraz, Hondarribiko udal batzari honako eskaera luzatu nahi diogu:

Gurekin batera publikoki salatu dezala Muara Elkarteak pairatutako azken eraso hau, biolentoa delako, elkarbizitzaren kontrako eraso zuzena delako eta Euskal Herria osoa batzen eta ordezkatzen duen sinboloa, ikurriña, suntsitu dutelako.

Elkarte honi babesa adierazi diezaiola pairatzen dituen erasoen aurrean.

Gure eskaera onargarria dela iritzita espero dugu denok aho batez goian aipatutakoa onartzea.

Hondarribiko EHBildu.

Muara elkartearen eta Hondarribiko EHBildu osatzen dugun alderdi eta militanteen izenean eskerrak eman nahi diogu udalbatza osoari emandako babesa eta elkartasunagatik. Kaltea eragiten saiatu diren horiek, entzun dezaten ozen: ikurrina, presoak etxeratzeko banderola eta borroka feministarena urratu eta txikitu dituzte, oihu faxisten bitartez beren amorrua agertu; ez dute lortuko ordea Euskal Herriaren aldeko borroka, borroka feminista ez eta euskal presoak etxeratzearen aldeko borroka etetea, askatasunaren alde dugun konpromisoa sendoagoa baita.